អាជីវកម្មសណ្ឋាគារថ្មី

គ្រប់សណ្ឋាគារថ្មីដែលដំណើការ     ក្នុងព្រះរាជាណាចក្រកម្ពុជាត្រូវមានអាជ្ញាបណ្ណឬវិញ្ញាបនប័ត្រមួយចំនួន។ លោកអ្នកអាចធ្វើការស្នើសុំអាជ្ញាបណ្ណ   ឬវិញ្ញាបនប័ត្រទាំងនោះនៅ៖

– ចំពោះអាជ្ញាបណ្ណទេសចរណ៍ សម្រាប់ដំណើការអាជីវកម្មសណ្ឋាគារថ្មី លោកអ្នក អាចស្នើសុំបាន បាននៅក្រសួងទេសចរណ៍ ឬនៅតាមបណ្តាមន្ទីរទេសចរណ៍ខេត្តក្រុងដើម្បីជួយ និងផ្តល់ជាព័ត៌មានសម្រាប់ការស្នើសុំរបស់លោកអ្នក ឬលោកអ្នកអាចស្នើសុំបានតាមរយៈគេហទំព័រ http://cambodiatourismindustry.org/។

– ចំពោះវិញ្ញាបនប័ត្របញ្ជាក់ការចុះឈ្មោះ ក្នុងបញ្ជីពាណិជ្ជកម្ម លោក អ្នកអាចធ្វើការសុំចុះវិញ្ញាបនប័ត្របញ្ជាក់ការចុះឈ្មោះក្នុងបញ្ជីពាណិជ្ជកម្ម តាមរយៈប្រព័ន្ធស្វ័យប្រវត្តកម្មសម្រាប់ចុះបញ្ជីពាណិជ្ជកម្ម www.businessregistration.moc.gov.kh ឬលោក អ្នកអាចអញ្ជើញទៅកាន់ នាយកដ្ឋានចុះបញ្ជីពាណិជ្ជកម្មរបស់ក្រសួងពាណិជ្ជកម្ម ឬមន្ទីរពាណិជ្ជកម្មខេត្តក្រុង ដើម្បីជួយ និងផ្តល់ជាព័ត៌មានសម្រាប់ ការចុះបញ្ជីពាណិជ្ជកម្មរបស់លោក អ្នក។

– ចំពោះការចុះបញ្ជីពន្ធដារ ពន្ធប៉ាតង់ អាករលើតម្លៃបន្ថែម និងពន្ធប្រថាប់ត្រា លោក អ្នកអាចធ្វើការសុំចុះបញ្ជី នៅអគ្គនាយកដ្ឋានពន្ធដារ(សាលាជាតិពន្ធដារ) ឬការិយាល័យពន្ធដារ ស្រុក ខណ្ឌ

– ចំពោះលិខិតអនុញ្ញាត(បើកទីតាំងអាជីវកម្ម) លោក អ្នកអាចអញ្ជើញទៅកាន់សាលារាជធានី ខេត្ត ក្រុងដែលអាជីវកម្មលោកអ្នកស្ថិតនៅ

– ចំពោះ ចុះបញ្ជិការប្រកាសបើកសហគ្រាស សៀវភៅបញ្ជីប្រចាំគ្រឹះស្ថាន សៀវភៅបើកប្រាក់ ចុះទិដ្ឋាកាបទបញ្ជាផ្ទៃក្នុង លោក អ្នកអាចអញ្ជើញទៅកាន់    ក្រសួងការងារ និងបណ្តុះបណ្តាលវិជ្ជាជីវៈ        ឫតាមប្រព័ន្ធបច្ចេកវិទ្យាព័ត៍មាន    (តាមរយៈប្រព័ន្ធonlineទទួលស្គាល់ដោយក្រសួងការងារ)។

– ចំពោះពន្ធលើស្លាកយីហោ លោក អ្នកអាចធ្វើការសុំចុះបញ្ជីបាននៅអគ្គនាយកដ្ឋានពន្ធដារ  ឬការិយាល័យពន្ធដារ ស្រុក ខណ្ឌ

– ចំពោះលិខិតអនុញ្ញាតស្លាកយីហោ លោក អ្នកអាចអញ្ជើញទៅកាន់សាលារាជធានី ខេត្ត ក្រុង ដែល អាជីវកម្មលោកអ្នកស្ថិតនៅ

លោកអ្នកតម្រូវឱ្យមានសំណុំឯកសារមួយចំនួនដូចខាងក្រោមសម្រាប់ដំណើរការស្នើសុំអាជ្ញាបណ្ណទេសចរណ៍ សម្រាប់ដំណើការអាជីវកម្មសណ្ឋាគារ៖

– លិខិតអនុញ្ញាតដាក់ទីតាំងធ្វើអាជីវកម្មចេញដោយសាលារាជធានី ខេត្ត

– អត្តសញ្ញាណប័ណ្ណ ឬលិខិតឆ្លងដែន(ថតចម្លង)

– វិញ្ញាបនប័ត្របញ្ជាក់ការចុះឈ្មោះក្នុងបញ្ជីពាណិជ្ជកម្ម

– លិខិតអនុញ្ញាតសាងសង់ ឬជួសជុលចេញដោយក្រសួងរៀបចំដែនដីនគររូបនីយកម្ម និងសំណង់

– លិខិតបញ្ជាក់ពីប្រព័ន្ធគ្រប់គ្រងអគ្គីភ័យ និងប្រព័ន្ធការពារ សន្តិសុខ សុវត្ថិភាព ចេញដោយក្រសួងមហាផ្ទៃ ឬស្នងការនគរបាលរាជធានី ខេត្ត

– លិខិតបញ្ជាក់ពីអនាម័យចេញដោយ ក្រសួង ឬមន្ទីរសុខាភិបាល

– កិច្ចសន្យាគោរព និងអនុវត្តច្បាប់ស្តីពីទេសចរណ៍ និងច្បាប់រដ្ឋនានាជាធរមាន

– រូបថត ៤ x ៦ ចំនួនបីសន្លឹក

អាជ្ញាបណ្ណទេសចរណ៍សម្រាប់ដំណើការ អាជីវកម្មសណ្ឋាគារផ្តល់អត្ថប្រយោជន៍ដូចខាងក្រោម៖

1. អាជីវកម្មលោកអ្នកត្រូវគេទទួលស្គាល់ថាជា នីតិបុគ្គលនិងទទួលបានការការពារដោយច្បាប់ នៃព្រះរាជាណាចក្រកម្ពុជា
2. ផ្តល់ទំនុកចិត្តដល់ដៃគូអាជីវកម្ម ដែលមានសារៈសំខាន់សម្រាប់ឧត្តមភាព និងកាលានុវត្តភាពក្នុងអាជីវកម្ម ព្រមទាំងជម្រុញឱ្យទទួលបានធនធានសម្រាប់អាជីវកម្ម ដូចជាហិរញ្ញប្បទានជាដើម
3. លោកអ្នកទទួលបានការប្រឹក្សាពីមន្រ្តីជំនាញ លើការចាប់ផ្តើមអាជីវកម្ម ដំណើរការអាជីវកម្ម និងការការពារអតិថិជន
4. ប្រសិនបើលោកអ្នកដំណើរការអាជីវកម្មសណ្ឋាគារដោយពុំមានអាជ្ញាបណ្ណទេសចរណ៍ សម្រាប់ដំណើការអាជីវកម្មសណ្ឋាគារ លោកអ្នកត្រូវទទួលការផាកពិន័យជាទឹកប្រាក់ចាប់ពី ២.០០០.០០០រៀល រហូតដល់ ២០.០០០.០០០រៀល

កំឡុងពេលស្នើសុំអាជ្ញាបណ្ណទេសចរណ៍ សម្រាប់ដំណើការអាជីវកម្មសណ្ឋាគារ លោកអ្នកត្រូវទទួលរងការត្រួតពិនិត្យដូចខាងក្រោម៖

(១) ប្រព័ន្ធគ្រប់គ្រងអគ្គីភ័យ និងប្រព័ន្ធការពារសន្តិសុខ សុវត្ថិភាពដោយក្រសួងមហាផ្ទៃ

(២) អនាម័យ ដោយ ក្រសួងសុខាភិបាល;

(៣) ត្រួតពិនិត្យទីតាំងអាជីវកម្មដោយអាជ្ញាធរមូលដ្ឋាន។

លើសពីនេះទៅទៀត លោកអ្នកត្រូវទទួលរងការត្រួតពិនិត្យកំឡុងពេលដំណើរការអាជីវកម្ម

(១)អនាម័យ ដោយ ក្រសួងសុខាភិបាល

(២)ប្រព័ន្ធគ្រប់គ្រងអគ្គីភ័យ និងប្រព័ន្ធការពារ សន្តិសុខ សុវត្ថិភាពដោយក្រសួងមហាផ្ទៃ

(៣) អធិការកិច្ចការងារដោយក្រសួងការងារ និងបណ្តុះបណ្តាលវិជ្ជាជីវៈ

(៤)ត្រួតពិនិត្យទីតាំងអាជីវកម្មដោយអាជ្ញាធរមូលដ្ឋាន