កិច្ចសន្យាការងារ ជាទំរង់ឯកសារផ្លូវច្បាប់និងផ្លូវការមួយនៅក្នុងក្រុមហ៊ុនឬអង្គភាពសំរាប់បញ្ជាក់ថា បុគ្គលិកនីមួយៗត្រូវបានអនុញ្ញាតិអោយធ្វើការដោយផ្អែកលើកិច្ចសន្យាច្បាស់លាស់ដោយភាគីទាំងនិយោជក និងនិយោជិកលើលក្ខខ័ណ្ឌដែលបានចែងក្នុងកិច្ចសន្យាការងារ។ ខ្លឹមសារក្នុងកិច្ចសន្យាការងារអាចមានភាពខុសគ្នាច្រើនឬតិចអាស្រ័យតាមការនិពន្ធរបស់ប្រធានគ្រប់គ្រងធនធានមនុស្ស។ ខាងក្រោមនេះ ខ្លឹមសារគំរូមួយសំរាប់ដាក់់បញ្ចូលក្នុងកិច្ចសន្យាការងាររបស់លោក-អ្នក។
ព័ត៌មានចាំចាច់ក្នុងលិខិតនេះ៖
- វិសាលភាពការងារ៖ រៀបរាប់អំពីវិសាលភាពនៃការផ្លាស់ប្តូរដែលពាក់ព័ន្ធនឹងមុខតំណែងនេះ ដែលកើតឡើងនាពេលខាងមុខ។
- លក្ខខ័ណ្ឌ៖ សូមបញ្ជាក់ពីប្រភេទនៃកិច្ចសន្យាថា នេះកិច្ចសន្យាការងារឥតរយៈពេលកំណត់ ឬកិច្ចសន្យាការងារមានរយៈពេលកំណត់។ សំរាប់ការយល់ដឹងបន្ថែម សូមអាន គំរូបទបញ្ជាផ្ទៃក្នុង មាត្រាលេខ៤។
- ម៉ោងធ្វើការ៖ សូមបញ្ជាក់ពីចំនួនម៉ោងធ្វើការ និងចំនួនថ្ងៃធ្វើការ។ ប្រសិនបើ ម៉ោងធ្វើការងារមានការផ្លាស់ញឹកញាប់ សូមបញ្ជាក់អោយបានច្បាស់។
- ប្រាក់ខែ៖ ជាទូទៅ និយោជកត្រូវបញ្ជាក់ថា ប្រាក់ខែនោះជាប្រាក់ខែដែលបានរួមបញ្ចូលទាំងពន្ធប្រាក់ខែហើយ។ ប្រសិនបើពុំបានរួមបញ្ចូលពន្ធប្រាក់ខែទេ សូមបញ្ជាក់ផង។ ចំណែកឯ ក្នុងកំឡុងពេលសាកល្បងចំនួន៣ខែ ជាទូទៅក្រុមហ៊ុនផ្តល់ជូន ៩០% នៃប្រាក់ខែសរុប ឬអាចជាចំនួនណាមួយដែលបានព្រមព្រៀងគ្នាមុន។
- វីន័យ៖ ប្រសិនបើលោក-អ្នក មានបទបញ្ជាផ្ទៃក្នុងដែលបាននិយាយពីវិន័យនិងច្បាប់ទម្លាប់ការងាររួចហើយ លោក-អ្នកគ្រាន់តែយោងលើលិខិតទាំងនោះទៅ ជាការស្រេច។ តែប្រសិនបើគ្មាន លោក-អ្នក បញ្ជាក់បាននៅចំណុចសំខាន់ៗមួយចំនួននៅទីនេះ។
- ចំនួនប្រភេទថ្ងៃឈប់សំរាកប្រចាំឆ្នាំ ជាចំនួនឈប់សំរាកបន្ថែមពីលើបុណ្យជាតិនានារបស់ប្រទេសកម្ពុជា។ សំរាប់ចំនួនប្រភេទនៃថ្ងៃឈប់សំរាកប្រចាំឆ្នាំ មានដូចជា (១) ថ្ងៃសំរាកសំរាលមាតុភាពប្រចាំចំនួន ៣ខែ (២) សំរាកព្យាបាលជម្ងឺ ៧ថ្ងៃ (៣) សំរាកក្នុងកម្មវិធីបុណ្យសពឬអាពាហ៍ពិពាហ៍ ៧ថ្ងៃ ។ល។ គួរដាក់នៅក្នុងបទបញ្ជាផ្ទៃក្នុងនិងលក្ខខណ្ឌការងាររបស់ក្រុមហ៊ុន។
- ថ្ងៃឈប់សំរាកបុណ្យជាតិ៖ ត្រង់ចំណុចនេះ លោក-អ្នកគួរគូសបញ្ជាក់អំពីប្រភេទថ្ងៃសំរាកបុណ្យណាខ្លះ ដែលក្រុមហ៊ុនរបស់អ្នកអនុញ្ញាតិអោយឈប់សំរាក ឬត្រូវឆ្លាស់វេនគ្នាសំរាក ឬត្រូវធ្វើការដោយមានគិតប្រាក់បន្ថែម។ តាមច្បាប់ការងារ និយោជិកទាំងអស់ត្រូវបានអនុញ្ញាតិអោយឈប់សំរាកនៅថ្ងៃបុណ្យជាតិនានាដែលកំណត់ដោយរាជរដ្ឋាភិបាលកម្ពុជា។
- ការបញ្ចប់កិច្ចសន្យាការងារ៖ សូមបញ្ជាក់ពីលក្ខខ័ណ្ឌរបស់ក្រុមហ៊ុនអ្នកក្នុងការបញ្ចប់កិច្ចសន្យា។ សូមអាន ច្បាប់ការងារដើម្បីព័ត៌មានបន្ថែម។
- បទបញ្ជាផ្ទៃក្នុង – លក្ខខណ្ឌការងារ៖ ជាទូទៅ ក្រុមហ៊ុនត្រូវមានឯកសារនេះសំរាប់ទុកជូនជាឯកសារយោងសំរាប់និយោជិកអានមុន។ សូមរកមើលគំរូឯកសារនេះជាជំនួយ។
- ការសម្ងាត់៖ សូមរៀបរាប់ពីលក្ខខ័ណ្ឌនានាក្នុងរក្សាព័ត៌មានសំងាត់របស់ក្រុមហ៊ុន និងបំរាម។
- ភាសា៖ ចំនុចនេះអាចដាក់ឬមិនដាក់អាស្រ័យក្រុមហ៊ុននីមួយៗ។ ក្នុងករណីដាក់ចំណុចនេះ មានន័យថា ឯកសារនេះត្រូវបានធ្វើជាពីរឬច្រើនភាសា ហើយភាសាដែលយកផ្លូវការណ៍ត្រូវបានបញ្ជាក់ក្នុងចំណុចនេះ។
- ច្បាប់និងយុត្តិធម៍៖ សូមបញ្ជាក់ពី ប្រភពច្បាប់និងតុលាការ ដែលត្រូវយកមកដោះស្រាយក្នុងករណីមានជម្លោះកើតឡើង។ ជាទូទៅ ច្បាប់និងតុលាការកម្ពុជា ជាកន្លែងដែលត្រូវយោងនិងដោះស្រាយប្រសិនបើភាគីទាំងពីរជាជនជាតិខ្មែរ ប៉ុន្តែភាគីទាំងពីរអាចជ្រើសរើសយកច្បាប់និងតុលាការអន្តរជាតិណាមួយផ្សេងបានប្រសិនពួកមានសញ្ជាតិផ្សេងគ្នា និងប្រទេសផ្សេងគ្នាដោយហេតុផលយុត្តិធម៌។ យ៉ាងណាក្តីភាគីទាំងពីរអាចជ្រើសរើសដោយផ្អែកលើការយល់ព្រមរវាងគ្នា។
